Так, тут менавіта такая музыка як здаецца з вокладкі і аздаблення.
Паветраны, светлы, крышталёва чысты ambient dungeon synth, працяжлівыя ноты на фоне мройна-задуменных арпеджыё.
Абсалютна нічога лішняга, и паўторана менавіта столькі разоў як трэба – якраз да тае пары як знікае страх што яно скончыцца занадта хутка.
Пад гэта ўтульна засыпаць, і вельмі прыдаўся гэты альбом на Каляды ў 2022 годзе. Я быў з дзецьмі ў гарах – у горналыжным курорце дзе не выпаў снег, і адпаведна не прыехалі людзі.
Цішыня па вечарах была проста малітоўная. Я клаў дзяцей засыпаць, адчыняў балкон каб упусціць марозную чысціню, і ціхенька ўключаў гэты альбом. Слухалі разам, пакуль не танулі па чарзе ў сон.
Спалучэнне марозу звонку, Nortfalke, бяздоннай цішыні ў вакне, і цёплай коўдры й любімымі людзьмі тут і цяпер.
У вакне слухала гігант Чрдзілі – гара-воўк, гара-мядзьведзь, і часам здавалася што яе крутая зялёная спіна напітваецца, наталяецца гэтай музыкай.